انقاذ فصعون 2

بعد ان تشرد فصعون مجددا كما روت تدوينة طباشير ونجح بالبكالوريا شحط ودخل الجامعة شحط ايضا  تفاجأ بل صدم عندما شاهد فصعونة  امامه لم يعرفها  من شكلها  لان وجهها كان مغطى بالخمار وانما عرفها من صوتها  لما كانت  تطلب المحاضرة من المكتبة  سالها: انتي فصعونة  تطلعت  هيك  قالتله  اي انت فصعون؟ عرفوا بعض  من جديد   بس تذكرت فصعونة فورا انو  الست ام فهمون  نبهتا  مليونين مرة انو  يا ويلك تحكي مع شب  فاستغفرت ربا  10 مرات  ومشيت بطريقا

فصعون  بهاليوم  كان  بالنسبة الو عيد وطني   لانو  الوحيدة يلي فهمت عليه  وكانت تطعميه من صندويشاتا وتساعده بدروسه  كانت فصعونة  ولما  تدخلت الست ام فهمون  بمعية ام واب وعيلة فصعون لانقاذه اايام الطفولة ومن وقتا  حالة فصعون  صارت  بتهوي  علاماته زفت  ودايما طايش ومطيش الناس حواليه  اما فصعونة  فالحجة ام فهمون  تدخلت وقالتلا  الحجاب وقاية الك  من الشباب  وفصعون  كان بدو  يقتلك  ويخطفك  وتحجبت وحطت خمار كمان  وبالزور  قبل ابو فصعونة  تدرس بالجامعة  بشرط ما تحكي مع شباب  وحط عليها  10 من رفقاتا  او بالاحرى ما حطون  اساسا هني  مجندين  ليخبروا اهلا  بكل شاردة ووارددة

فصعون رجع مبسوط وقرر  يتحرى اكتر عن فصعونة اللي عرف انو هيي معه بنفس الفصل والسنة والقسم  ورجع  صار يشوفا من بعيد  لبعيد  ويبعتلا الكتب والمحاضرات وهي  تحطله ياهون بالمكتبة بدون ما حدا يشتلق

فصعون  قطع 3 سنين  هوي وفصعونة وهني سوا ما حدا منتبه عليون  وفصعونة  كتير  مبسوطة انو رجعت شافت فصعون  وصارت  فرحانة كتير وحياتا انقلبت كمان  صاروا يقعدوا ورا الحديقة ويدرسوا سوا  وقدامه رفعت الخمار لانو هيي بتعرف منيح انو فصعون  شب محترم وواعي  وبالاساس  هي  مو مقتنعة بالخمار

لحد ما اجا يوم  كانت وحدة من الصبايا عم تمشي ولمحت فصعونة عم تاكل صندويشة وعم تقرا  بكتاب مع  شب  وراحت طيران  لعند  الحجة ام فهمون  وخبرتا انو فصعونة ارتكبت المعصية والعياذ بالله

ونطت ام فهمون  وبوشا لعند ام فصعونة اللي بدورا استلمت ابو فصعونة واخو فصعونة اللي  عملوا اجتماع  وقرروا  غسل العار  اللي لبس العيلة بكل الطرق المشروعة وغير المشروعة

نطروا  لترجع  فصعونة  وبهالوقت كان عم يتناقشوا بين انو  بس يفهموها غلطا  او انو  يحبسوها او يقتلوها   وبهالوقت رجعت فصعونة  واتفقوا انو  يخبروها انو  انتي محبوسة بالبيت  وبلا طلعة ولا فوتة ليجي عريسك

قصعون حس انو فصعونة  ما عد اجت للجامعة وفهم  بطريقة او باخرى  انو شو صار مع فصعونة  وزعل كتير  والتقى بشب قله انو حرام اللي عملته ولازم تستغفر ربك على اللي عملته  لانو هاد غلط  وغلط كبير  واحسن شي تهتدي  وترجع للطريق القويم

ورجع فصعون  وتراجع معها  قبل التخرج  بسنة  وماعاد سئل عن فصعونة ولا عن حدا بالحياة  عم يقضيها  بالقهوة  وبنثر الحكي عالناس  للهداية  والطريق الصواب  والاهم  انو تم انقاذه للمرة الثانية هو وفصعونة